"Подобро за градот Охрид" - ќе биде мотото на работењето на новиот состав на ОК на ВМРО - ДПМНЕ во иднина. Оттаму денеска најостро го искритикуваа патувањето на градоначалникот Петрески во Австралија, во моменти кога на градот тој му е најпотребен. Тие побараа негова неотповиклива оставка.

Советничката група на ВМРО - ДПМНЕ повторно го изрази своето незадоволство од злоупотребата и недоличното претставување од таканаречената делегација која замина за Австралија во друштво на градоначалникот Александар Петрески, а се претставени како претставници на совет. Со тоа е нанесена навреда кон сите членови на советот на Општина Охрид, како прв орган на локалната самоуправа и најнедолично кон граѓаните, велат од таму. Токму пшоради ова недолично однесување на градоначалникот Петрески новоизбраниот претседател на ОК на ВМРО - ДПМНЕ, Атанаско Михаилов, постави неколку прашања:

„Дека работите со оваа посета на Австралија не се чисти, прашуваме: - Како тоа на општинаската њеб страница на која секојдневно читаме со кого и каде бил, токму за оваа посета нема ниту еден збор. Господине Петрески што сакате да скриете од своите граѓани? Од што се срамите, штом брутално забранивте било што да се објави? Од кого се срамите и бегате, кога моравте без срам и морал да избегате од институциите од кои барате виза? Знаете ли дека за лажење и лажно претставување се сноси кривична одговорност? Што, зошто и кого лажете"?

Што Охрид видел од ваквите туристички посети, прашуваат тие. Охрид ќе ја надмине оваа борба со природата, но граѓаните ќе знаат дека нивниот „татко" избега кога на градот му е најпотребен. Совесните политичари вакви постапки не смеат да си дозволат, обвинува Атанаско Михаилов, го побара следново:
"Го повикуваме Петрески што побргу да се врати од таму за да може веднаш наредниот ден да си ја поднесе оставката на функцијата градоначалник, затоа што за ваков чин ништо друго и не му преостанува".

Како нов претседател на општинскиот огранок на ВМРО - ДПМНЕ од Охрид Михаилов вети дека континуирано ќе работи во корист на граѓаните. Секогаш кога ќе се носат одлуки во нивен интерес тие ќе помагаат во донесувањето на истите. Исто така ветува дека ќе носат проекти, одлуки и свои мислења, а кога ќе насетат дека се работи за одредени лични интереси и промашени проекти, сесрдно и на цел глас ќе критикуваат. Новиот состав на ОК на ВМРО - ДПМНЕ, тоа ќе го прави континуирано. Исто така Михаилов истакна дека стои зад интегритетот на секој новоизбран член на советот.