ВМРО - НП алармира до надлежните во државата за тешката состојба во која се наоѓаат општините Охрид и Струга и дека мерките кои се досега превземени ни оддалеку на одговараат на вистинските потреби.

Состојбата со високото ниво на Охридското езеро, ја подгреа совеста и кај ВМРО - НП, од каде денеска укажаа на можните последици во наредниот период. Бидејќи следи пролетниот период кога и се очекува покачување на температурите, нормално ќе следи и дополнително покачување на нивото на езерото. Тоа се темели на фактите дека снеговите од околните планини ќе започнат да се топат, а дополнителен проблем се и постојаните врнежи од дожд и снег. Сепак ваквата критична состојба со нивото на езерото не може да и се припише само на природата, туку во најголема мерка и на лошото менаџирање со езерото како хидроакумулација, вели советникот Владо Цветковски.

„Досегашните искуства ни кажуваат дека ваквата состојба не се должи само на обилните врнежи од дожд и снег, туку и заради несоодветното управување со водостојот на Охридското езеро, како хидроакумулација, од страна на ЕЛЕМ. Со цел да се акумулира што повеќе вода во езерото како хидроенергетски потенцијал, но и поради поплавите во соседна Албанија, ЕЛЕМ неоправдано го држеше високо нивото на Охридското езеро во од месец септември до месец јануари. Сега дотокот на водите во езерото е поголем од истекот преку реката Црн Дрим'' - рече тој.

Не е во ред граѓаните редовно да си ги подмируваат обврските кон ЕВН, а со тоа и кон ЕЛЕМ, а овие за возврат недомаќински да стопанисуваат со нивните пари, велат од Народна. Должност на ЕЛЕМ и на Владата на РМ е превентивно да ги чистат и одржуваат речните корита на Црн Дрим и Сатеска, но и на другите реки во ова сливно подрачје. Од ВМРО НП посочуваат на одредени мерки кои овие два сегменти треба да ги превземат за санирање на состојбата со езерото.