Реномираниот производител на меморија „А-ДАТА“ најави дека во почетокот на 2010 година ќе започне со продажба на екстерен тврд диск што ќе има конекција со персоналните компјутери преку порт УСБ 3.0.

Моделот „А-ДАТА Н002“ е тврд диск, кој е базиран на флеш-меморија, што му овозможува одлични перформанси во впишувањето и пренесувањето на податоци. Моделот „Н002“ запишува податоци со брзина од 170 мегабајти во секунда, а ќе ги чита со брзина од 200 мегабајти во секунда. Освен преку УСБ 3.0, овој уред може да се приклучи и со својата стандардна конекција САТА-2.

Дискот ќе се испорачува со софтвер „А-ДАТА“ и со пакет „Нортон интернет секјур 2010“ со лиценца што има 60 дена важечки рок. Засега од компанијата не најавија која ќе биде цената на овој диск, ниту пак, колку верзии, односно какви модели, ќе бидат понудени во зависност од меморискиот простор.